MAGDARAOS ng motorcade sa Marso 11, 2026 ang koalisyon ng PANA at KAMPILAN bilang paggunita sa unang anibersaryo ng pag-aresto kay dating pangulong Rodrigo Roa Duterte sa Villamor Air Base at ang kasunod na pagdadala sa kanya sa The Hague.

Ayon sa mga organizer, layunin ng aktibidad na balikan ang naturang pangyayari at ipahayag ang kanilang paninindigan sa mga isyung may kinalaman dito, kabilang ang usapin ng soberanya at proseso ng hustisya.

Sinabi ng koalisyon na magsisilbi rin ang motorcade bilang plataporma upang ilahad ang kanilang panawagan laban sa katiwalian at para sa mas mataas na antas ng pananagutan sa pamahalaan. Binigyang-diin ng grupo ang kahalagahan ng transparency, maayos na pamamahala, at wastong paggamit ng pondo ng bayan.

Kasabay ng paggunita, pormal ding ihahayag ng koalisyon ang kanilang suporta sa kandidatura ni Sara Duterte sa 2028 presidential elections. Ayon sa kanila, magsisilbi itong pagpapakita ng pakikiisa sa Bise Presidente at sa mga adbokasiyang isinusulong nito para sa bansa.

Nakatakdang magsimula ang motorcade alas-2:00 ng hapon sa White Plains Avenue at daraan sa EDSA patungong Villamor Air Base. Inaasahan ng mga organizer ang paglahok ng kanilang mga miyembro at tagasuporta sa mapayapang pagtitipon, na inilalarawan nilang bahagi ng demokratikong pagpapahayag ng saloobin.